踏入10月又開始了結婚的旺季，加上限聚令變得較以前寬鬆，好多新人都開始舉辦返婚宴活動。 今天新人出門的地點是金鐘美利酒店之後去薄扶林伯大尼教堂教堂行禮，這路線自己都數不清行過了多少次，但今天真的有很大的挑戰。 因為我今天要駕駛的花車是結婚花車界中的殿堂品牌”勞斯萊斯”。 可能公司見我的駕駛記錄良好因此，嘗試讓我駕駛這架車價超過4百萬的豪華結婚花車。

 

 

之前我都試過頂替其他司機去駕駛賓利房車工作， 但駕駛勞斯萊斯都真的是第一次。 在我們公司駕駛賓利或勞斯萊斯這些豪華車輛的薪金是會比駕駛一般的花車高， 但也要有很良好的駕駛經驗才有駕駛這些車輛的機會，簡單來說公司就是想這些昂貴車輛發生意外的機會盡量減到零。 原因好簡單勞斯萊斯一但有意外，維修費就是天價般昂貴。 好像車身的油漆已經同普通車有好大的分別，勞斯萊斯車身是噴上五層的油漆，大家可能唔知每一架勞斯萊斯車身都會有一條腰線，每一條腰線都是由廠方的老師傅徒手畫上去，我都唔知點解要咁樣做，可能係車廠傳統。 如果碰撞傷及這個腰線地方，維修的時間會更加長，單單是修補車身的損傷就已經要用高昂的金錢及頗長的時間， 因此駕駛這架勞斯萊斯是絕對不容有任何錯失。

 

 

當我坐上這架豪華房車的司機位，就會立即感受到這架車的與別不同，車廂內的裝飾及製工完全是一絲不苟， 基本上每一個位置都是藝術品。 座位的舒適程度比起好多真皮梳化有過之而無不及，客人踏上車廂的地氈時都能立即感受到勞斯萊斯品牌的魔力。

之前聽過駕駛勞斯萊斯的司機講過，酒店對這架車好好，好多時都會把最好的位置留給車輛停泊， 原因是酒店都想擺架靚啲嘅車喺門口，這樣大家見到都精神啲、開心啲。 以及擺喺當眼位，停泊在旁邊的車輛都會小心啲開門，免得有任何碰撞。

 

 

我今天就能體會到這個酒店的禮遇，新人並沒有在酒店安排預留任何車位， 而酒店周圍都停泊滿了車輛，只有幾個後排較為核狹窄的位置。 酒店職員知道車輛係主花車，立即移開酒店正門的雪糕筒讓我停泊在酒店門前。 酒店職員好眼利，一眼就認得出平時不是由我來駕駛這一架車，同佢講咗幾句之後我就開始佈置花車。 難得有一個咁好嘅停車位置及一架咁靚嘅勞斯萊斯，我梗係要爭取機會幫架車影多啲相介紹給大家。 平時租用Tesla Model x 的客人都好喜歡鷗翼車門，而這一架勞斯萊斯的車門也好特別，就是對門的設計。這樣的設計令後座的乘客上落車時更加輕鬆，而且攝影師拍攝新郎幫新娘開門這一張相，構圖方面比起其他的車輛好看得多。

 

 

今天新人用了很多的時間在酒店門外拍攝結婚照片，租用了這一架名貴的勞斯萊斯結婚花車，當然要用多啲時間同佢影多啲靚相才值回票價。 最後起程的時候只有大約20分鐘左右由美利酒店去薄扶林伯大尼教堂。 我明白新人比較趕時間 ，我亦知道只要我肯比油，這一架6000 cc的怪物就能提供用不完的力量及速度，但係我都只用正常的車速去駕駛這樣一架豪華房車，畢竟我始終都只是第一次駕駛勞斯萊斯，車輛及乘客的安全最緊要。 好彩新人在車程中正忙於欣賞車廂及自拍，沒有對我的駕駛速度有任何意見。 雖然準時到達目的地， 但是只是與新人在車廂中作簡單的道別後，他們便一支箭衝入教堂，這時完成花車工作後， 我才能鬆一口氣。 明明勞斯萊斯車廂應該是很舒適的，但在這短短的20分鐘車程中， 我使用了加倍的集中及謹慎度，就連軚盤也需要緊緊握實，這樣令我感覺像做了長時間的工作的疲累。 可能勞斯萊斯這些昂貴的車輛只會帶舒適感受給予乘客， 而不是駕駛者， 難怪一向都講有錢佬係唔會揸勞斯萊斯， 只係會坐!